Purandar | निरा मोरगांव मार्गावर भीषण अपघात,ओव्हरटेकचा प्रयत्न महागात; ट्रकच्या चाकाखाली येऊन तरुणाचा मृत्यू..!

           

निरा-प्रतिनिधी: 

               अहिल्यानगर-सातारा महामार्गावर शनिवारी (दि.६) सायंकाळी साडेचारच्या सुमारास झालेल्या भीषण अपघातात विजय कुवरलाल साखरे (रा. बोपर्डी, जिल्हा नागपूर, सध्या मुक्कामी वाई एम.आय.डी.सी.) या दुचाकीस्वाराचा मृत्यू झाला आहे.

मिळालेल्या माहितीनुसार, एम.एच. ११-सी.झेड. ३१०२ या क्रमांकाच्या होंडा शाईनवरून विजय साखरे पत्नी लता साखरे यांच्यासोबत प्रवास करत होते. दरम्यान, एम.एच. २०-जी.सी. ७८११ या ट्रकला डावीकडून ओव्हरटेक करण्याच्या प्रयत्नात दुचाकी घसरली. यावेळी मागे बसलेल्या महिलेसह दुचाकी रस्त्यावर कोसळली. दुर्दैवाने विजय साखरे थेट ट्रकच्या चाकाखाली गेल्याने गंभीर जखमी झाले.

हेल्मेट घातले असूनही अपघाताच्या धक्क्यात ते डोक्यावरून निघून गेले. अपघातात साखरे यांना प्रचंड रक्तस्त्राव झाला. घटनास्थळाजवळच असलेल्या खाजगी रुग्णालयात त्यांना तातडीने दाखल करण्यात आले. मात्र प्रकृती गंभीर असल्याने पुढील उपचारासाठी लोणंद येथे हलवण्यात आले. उपचारापूर्वीच त्यांनी प्राण सोडले.

अपघाताची माहिती मिळताच नीरा पोलीस ठाण्याचे सहायक उपनिरीक्षक रविराज कोकरे व हवालदार संतोष मदने यांनी घटनास्थळी धाव घेतली. पोलिसांनी ट्रक व दुचाकी ताब्यात घेतली असून पुढील तपास सुरू आहे.